من رباعيات جاهين
******
نوح راح لحاله و الطوفان استمر
مركبنا تايه لسه مش لاقيه بر
اّه م الطوفان و اّهين يابر الامان
ازاى تبان و الدنيا غرقانه شر
!!!عجبى
*****
قالوا السياسة مهلكة بوجه عام
و بحورها يا بنى خشنة مش ريش نعام
غوص فيها تلقى الغرقانين كلهم
شايلين غنايم00والخفيفاللى عام
عجبى
*****
انا كل يوم اسمع 000فلان عذبوه
اسرح فى بغداد و الجزائر و اتوه
ما اعجبش م اللى يطيق بجسمه العذاب
و اعجب من اللى يطيق يعذب اخوه
!!!عجبى
*****
يا قرص شمس ما لهش قبة سما
يا ورد من غير ارض شب و نما
يا اى معنى جميل سمعنا عليه
الخلق ليه عايشين حياه مؤلمه
!!!عجبى
*****
فى يوم صحيت شاعر براحة وصفا
الهم زال و الحزن راح و اختفى
خدنى العجب و سالت روحى سؤال
انا مت؟ ولا وصلت للفلسفة
!!!عجبى
*****
انا شاب لكن عمرى الف عام
وحيد لكن بين ضلوعى زحام
خايف و لكن خوفى منى انا
اخرس و لكن قلبى مليان كلام
عجبى
******
قطى العزيز راقد على الكنبات
فى نوم لذيذ..وبيلحس الشنبات
وانا كل عين فنجان مدلدق قلق
صدق اللى قال الدنيا دى منابات
عجبى
*****
شاف الطبيب جرحى وصف له الامل
و عطانى منه مقام يا دوب ما اندمل
مجروح جديد يا طبيب و جرحى لهيب
و دواك فرغ منى00وايه العمل
!!!عجبى
*****
عجبتنى كلمة من كلام الورق
النور شرق من بين حروفها و برق
حبيت اشيلها ف قلبى..قالت حرام
دا انا كل قلب دخلت فيه اتحرق
عجبى
*****
اعرف عيون هى الجمال و الحسن
واعرف عيون تاخد القلوب بالحضن
و عيون مخيفه وقاسيه وعيون كتير
و باحس فيهم كلهم بالحزن
!!!عجبى
*****