قصيدة مصر يامه يابهية لعمنا الشاعر الكبير احمد فؤاد نجم
يسبق كلامنا سلامنا يطوف ع السامعين معنى
عصفور محندق يزقزق كلام موزون وله معنى
عن ارض سمره وقمره وضفة ونهر ومراكب
ورفاق مسيرة عسيرة وصورة حشد ومواكب
فى عيون صبية بهية عليها الكلمة والمعنى
مصر يامه يا بهية
ياام طرحة وجلابية
الزمن شاب وانتى شابة
هو رايح وانتى جاية
جاية فوق الصعب ماشية
فات عليكى ليل ومية
واحتمالك هو هو
وابتسامتك هى هى
تضحكى للصبح يصبح
بعد ليلة ومغربية
تطلع الشمس تلاقيكى معجبانية وصبية
يابهية
الليل جزاير جزاير يمد البحر يفنيها
والفجر شعلة هتعلى وعمرالموج ما يطويها
والشط باين مداين عليها الشمس طوافة
ايدك فى ايدنا ساعدنا دى مهما الموجة تتعافى
بالعزم ساعة جماعة وبالاصرار نخطيها
مصر يامه يا سفينة
مهما كان البحر عاتى
فلاحينك ملاحينك
يزعقوا للريح يواتى
اللى ع الدفة صنايعى
واللى ع المجداف زناتى
واللى فوق الصارى كاشف كل ماضى وكل اتى
عقدتين والتالتة تالتة
تركبى الموجة العفية
توصلى بر السلامة معجبانية وصبية
يا بهية
ويعود كلامنا بسلامنا يطوف ع الصحبة حلوانى
عصفور محنى يغنى على الافراح ومن تانى
يرمى الغناوى تقاوى تبوس الارض تتحنى
تفرح وتتطرح وتسرح وترجع تانى تتغنى
اللى بنا مصر كان فى الاصل حلوانى
من الردود لاحد الاخوات من مصر:
مصريامه يا بهية
الاغنية دي رددت في فيلم العصفور ليوسف شاهين..
كل شوية يغنوها..
عموما الاغنية دي ماتعملتش عشان الفيلم.. بس الفيلم ادخلها..
الاغنية من تاليف الشاعر احمد فؤاد نجم وهو من اشهرالشعراء العاميين
ممن عايش الضروف الصعبه.. ومن تلحين صديقه الكفيف-
- الشيخ امام رحمة الله عليه..
الاتنين دول كانو بيحاربوا الفساد و الظلم و الجهل بالكلمة القوية واللحن
اللي يوجع.. و ياما زاروا المعتقل عشان انتقادهم للنظام
-الناصري في الغالب- و يمكن ده عمق من كراهيتهم للسلطة..
و طبعا بما انهم ناس شعبيين كانو بياكلوا يوم وعشرةلاء متعففين..
و بما انهم مثقفين.. وقبل ده وده مصريين كانو خفاف الدم فعلا, ولهم مواقف طريفة كتير..
بالنسبة للاغنية هي طويلة شوية.. بس اللي انا فاكراه منها المقطعين اللي اتكرروا في الفيلم كتير..
و هاكتبهم عشان كل اللي مش عارف الاغنية اومش فاكرها, يعرف احنا بنتكلم عن ايه..
من القصيدة المغناه:
ومع رفاق مسيرة عسيرة وصورة حشد انساني..
ومواكب في عيون صبية بهية عليها القول والمعنى..
مصر يامّه يا بهية.... يا ام طرحة وجلابية
الزمن شاب و انتي شابة....هورايح وانتي جاية
جاية فوق الصعب ماشية....فات عليكي ليل ومية
و احتمالك هو هو....و ابتسامتك هي هي
تضحكي للصبح يصبح.... بعد ليلة ومغربية
تطلع الشمس تلاقيكي....معجبانية وصبية يا بهية