لي روح مالي سبعه ارواح= كل يوم تأخذ روح وتروح
لا تستوي للروح سفاح = مالك بقتل الروح مربوح
يا أهل الهوى مطعون برماح=. وبحد سيف رهيف مذبوح
لي جرح ما يرفيه جراح= لو في رفي الجروح ممدوح
اتفرعن من فرعه اجراح= لين لمتلئ الفؤاد بجروح
لي ما دري بي قال مرتاح= سالي وبالي دوم مشروح
غر الجسد من خاري وصاح =ما يدري أنه صدري يفوح
لكني أتسلى بالمزاح= ما بين الخافي ولا بوح
أرد يا بو خد وضاح= وأقول لك لا تلف الروح
لي روح مالي سبعه أرواح= كل يوم تأخذ روح وتروح
خلوه ياخذ ع كيفه لاتردونه=ان راد ماراد يشر بس بأبنانه
لي مثل هذا من الواجب تراعونه=تقضو مراده قبل لاينطق لسانه
خافوا من الله حرام انكم تهملونه=من للعمى عنده علاج ويذخر عيانه
هذا كما عود صعب نعيش من دونه=ان مات متنا ونحيا تحت عيدانه
حكمه في ظله وف ثماره وفي لونه=حتى النصخ صخره ربي من اغصانه
لاتتركونه لزوم انكم تحاضونه=خلوه رويان يتهزع ف بستانه
بلاه يومن فالعمر لاتعدونه=بيس بحياتن بدونه مالها خانه
ميدول توه صباه يداعب فنونه=سبحان من ميزه بوصوف فتانه
ساكن شقى العشاق في محجر عيونه=والموت الاحمر سكن في روضة اوجانه
دنق بروسن قوية باس مصيونه=أقصى ملك فارس وضاح اليمن هانه
لو ماجميل المحيا شتت ذهونه=كان أبرهه من يوازي كبح طغيانه؟
قتيل الرموش الجارحه لاتلومونه=باده الغرام وزلزل الشوق وجدانه
اذا تنتزع الاروح بسيوف مسنونه=ذا ينتزعها برمش عيون نعسانه
بالله عليكم ياهله لاتهينونه=ولا تركو شانه لمن يعرفو شانه
ياليتني من بني عمن يخصونه=والله لاقدم نظر عيني على شانه
غض طرفك وارضف حجابك=والله اني منك مبهوتي
يوم هذي شلت أهدابك=وش بقى من سحر هاروتي
آه ياويلي من أسبابك=شفت فالطرف الحور موتي
فيك أرد الشان وأعزابك=وانت كنك فيك جبروتي
كم ترجيتك ولا يابك=واختنق من عبرتي صوتي
ها أنا واقف أتليابك=طعت ماطاعت بي وقوتي
ان حكمت بحكمك أرضابك=وان صفحت بصفح مبخوتي
خذ بقايا العمر ع حسابك=بالفتر والشبر والفوتي
تنعدم عيشه بليابك =حرمتني شربي وقوتي
أن بقيت أموت واحيابك=وأن فرقني عنك الموتي
ينجلي غيرك شرى سحابك=وانت فالمعلوق منحوتي
أعتنابك ربك ويابك=يوسفي الوصف منعوتي
فالحصابي تزهو حصابك=انت يابربر ياياقوتي
بالشرف صانك وتاقابك=في خدر وحشام لبيوتي
عرب في سلوبك وغادابك=حرص مايسعوبك جمودي
لوحدت بك عني ركابك=لك غلا فالجاش مكبوتي
سال شرتا ريف مسحابك =لك يجيب الصيت مثبوتي
كان صبحبك ومسابك=وانجدى حتا ومصفوتي
ان كنت رومنسي ف عواطفك تحكم=انا كلاسيكي فتصدير الاحكام
اذا تفكر حبك يوقفني أبلم=فعلمك يكون اللي تفكر به أوهام
نحنا حرار ونطعم الذل علقم=ربينا وشبينا ع عيشة أكرام
أن يتني بالشين بخطرك وأعلم=أستاصل الموقع عقب عضة السام
وان يتني بالزين ياصاحبي أغنم=والله لازين بك على صدري وسام
لولا العواطف ماهلك محسن أسلم=ولا هام جلجامك ف تحقيق الاحلام
ولاغادر الراعي من الكهف واندم=ولاقامت سبرطع ع طوراده اعوام
عن غيهبت الاطناب بالموجز أحكم=واناسق المعنا على روس الاقلام
أجر وانصب وارفع الحرف بالضم=واسند الناقص على المسند التام
لاني أنا سقراط فالكيف والكم=ولاني أنا سولون في شرع الانظام
الا استخلص الزبده من المدح والذم=واستنتج العبره من صروف الايام
مجرى الهوى بالضم والصمت والصم=ونحاضي الخير محاضاة الاعمام
علينا هوانا خلفه خالن وعم=عوايد ورثناها من يدودن قدام
هواوي ولكني على امابي اكتم=وادرى الوفا واحاتي اللوم والتام
واموت ع شوف المليحات واغرم=الفاتنات الغرنجيات الاحشام
ياخنجرن يتني على الينب الاعسم= وتسللت بين المفاصل والاعظام
محنايتن مبرايتن تنكب السم=مسمايتن تخنق مخاطيف الانسام
هي والله اني جستا وتخدم اخدم=وتقسم المهجه على سبعة أقسام
يمانيتن تنعش على ريحة الدم=مفتوقت الحدين معطوفة اللام
لاتندهش ياسامع الجيل وافهم=على سالب وموجب يبتلك جمع الارقام
اجمع احداث الوثت واظرب وقسم=واستخرج الناتج من حساب الايام
ياطرف خذلك من دجى ليلك شوي= وهيع قبل يدرك نور الصباحي
لبس الدجى ياطرف للكاين الحي= لي عاد من عقب العنا والكفاحي
لي جنح ديجور الدجى طوق الحي= تغضي النواظر وانت ياطرف صاحي
خل الامر يمضي كما نسمة الفي= على السهر وفراق نومك نواحي
ان كان بك من غيبت صويحبك شي= هذاك من سهد الليالي ستراحي
عن دنيتك في دنية السعد والغي= تمضي اوقاته في هنا وانشراحي
وانته من ثياب الحزن مرتدي زي= وشلك بحدن صد عنك وشاحي
لولا جفاه معيبي فالشقا عي= ماعاد يجدي فالبعايد نواحي
ماتشوفني من جورهم منكوي كي=و الله يضمد بالتسلي جراحي
ياغبنتن تضوي على خاطري ضي= تنتابني بين العصر والرواحي
وان جن ديجور الدجى فكري أيدي= ويسج بي بين السحر والصباحي
لج معلوق الحشى فالهوى لي= ذاك الذي لي مر ما مايواحي
لي شل بأهدابه على غفله وبي= يتسابقن لك ع المقاتل رماحي
كاعب حسبته عن دجى ظلمتي ضي= واصبح يمثلي الحزن والافراحي
لي دار لي ذكرى على جرعة الري احزيت به لوهو زلالٍ قراحي
ليام تطوي اعمارنا يالغلا طي= حدد مسارك والذي راح راحي
ان كنت وافي طال مادمتلي حي= والله لقدم لك حياتي ع راحي
وان كان ماعندك بقى م الوفا شي= دنيا الهوى ماهو بلعب ومزاحي
صلب نسيم المطلعي
صبّيت باصبوعي الصبـي=وصبعي صبيـيّ صوّبـه
خيط المظله انقـص بـي=وانـا معالـي لعقـبـه
حظّي يـا ربعـي باربـي=بين الحبيـب وصاحبـه
واحد خصم لـي راتبـي=واحـد حرمنـي المرتبـه
سوّيت عمـري كهربـي=وخدمه اخدمتني الكهربه
لحقوا عليّـه يـا اعربـي=هـذي القضيـة متعبـه
النـاس لدّغهـم دبــي=وانـا الدغتنـي عقربـه
في البحر الاحمر مركبـي=لعب الامـواج اتلاعبـه
هب اعربي .. تنادي اجنبي=جانك بغيـت اتخاطبـه
يوم التخصص فـادبـي=لا تمتـحـن لمحاسـبـه
عنـدي المعنـى مختبـي=يالمستمع مـا بـوح بـه
خايف من الشخص الغبي=ياخـذ المعنـى ويقلبـه
أنا اكعبي واصلي اكعبـي=وفن الهوى مـا حاربـه
نفسي في لبّـاس العبـي=وايد يا ربعـي معجبـه
قوتـي اهـده ومشربـي=وترف الصبى ما اهدبـه
مايـوز دون اصويحبـي=لـو تسمعونـي اعاتبـه
غاية مـرادي ومطلبـي=موتة غريق امـوت بـه
محبٍ حبـا حبّـه حَبـي=حوّط حشاي وحل بـه
ذكراه يـوم اتمـر بـي=اشـرق بريـق اليرعبـه
في ناظـري مالـه وبـي=م المشرقـه للمغـربـه
صلّيت به علـى النبـي=مثـل الحلـي لمْذهِـبـه
هذاك وصفته على الدر والمرجان
هذاك وصفته على الدر والمرجان=وهذا يفوق الدر ولمرجان الدانه
الله وكبر كان هذا جمال انسان=هذا ابدوي لكن من وين بدوانه
شفته دجر يمشي من الكيفه على البهمان=ياحافظ عليه وعلى ترابه وعربانه
برقلي بعينه وشاملني شراى الهفان= تمت اليثه والعقل ضاع برهانه
ناظرني بـعـيـنه وشـاملـني شرا الهـفـان=تبت الجثه والعقـل ضـاع برهـانـه
قمة أنتفض شروى أنتفاضت هل الزيران=أثر الود لبسـني من ثيـاب زيرانه
قـام وقـبـل صـوبي وسـمـيـت بـالـرحمــن=وعن غـيب قمة أرتـل أيات قرأنه
غـر غـرير غـرنـجي في غـرته غـرمـان=ومن غرته ريت الغرانيج غيرانه
لابــرتــقــال الـخــد لاخــــوخ لارمـــــان=لاتـبـر لادر لا بــلـور ولا دانـــــه
لانـجـم لاشـمـس لاكـوكب بدر شعبــــان=تعايت وش قايل أوصفهن ألوانه
على لون لوجان قلت الورد في البستان=ولاريت ورده ناسبة حمرة أوجانه
وان كان موعد لليلة القدر على حـــــان=تمنيت شوفه عقب صده وهجرانه
الطبيب
قال وش يشكيك يا مصبح = .قلت صدري كان تفطن لـه
قال وش به قلتلـه يفـوح = .مثـل يـوم تفـوح الدلـه
قال تمزح قلت وين أمـزح = .زيوم جسمي يرتعـش كلـه
قـال روح قلـت مـاروح = .قال حاجـز قلـت لا والله
قال عيل باكر عندنا صبـح = .كان ماهانـت بـك العلـه
قلـت اول بـد المـجـرح= .و الذي ما منجـرح خلـه
قال غيرك عندنـا يصيـح=.ما تشافى من وجعـةٍ لـه
قلت يـوم بونتـه يطـوح= وين عني سمعـك تشلـه
قال لو مـا تبغـي تبيـح=.لي فبالـك أقـدر اوصلـه
قلـت كايـد حلـك يريـح=.كان مابـي تقـدر تحلـه
قال عاشق قلـت متسـوح= بين شمس الود و الظلـه
قال في روض الهوى مطيح=.قلت بين اشواكـه و فلـه
قال يعلـه حظـك يربـح=.قلت مادايـم علـى حلـه
قال لي ما حظـه اتسمـح = .وش تبا الدكتـور يعملـه
قلت هذا دواك يـا مصبـح= وش تبا {عطلت خلق الله}
مصبح بن علي الكعبي ..!!
هامة شعرية يقف لها القارئ بكل أجلال وأحترام ..!!
وهو القائل :
خذت من عشتارك السحري ..= . و من حدائق بابل الجوري
فيك نقش الســـومري يغري .= .. وازدهار العهـد اللاشـوري
حرت بين اغصـونك الخضري ..= . وانت كأنك واحـة ازهوري
بوجناتك ورد سـوقـــــــطري ..= . و ف شفاتك توت لاهـوري
لا ذهـــب لا ماس لا تـــبري ..= . لولوي من جــــنة الحـوري
ذقت في القيـــــمر البصري ..= . واحتسيت السكر الصـوري
شادني اعفــــر غنج خفري ..= . احوري ٍ حسـنك اسطوري
فيك هيبة لطلسي الصخري ..= . وانسجام الساحل السوري
رمش عينك للاســــر وكري .= .. من زمن تغلب و كافــوري
برمجت الذاكــــــــرة حصري .= .. لين هام ابحبك اشعـوري
عــــــود كمـــــــبودى
ممكن أضحي بمالي وممكن بحالـــــى= الاّ السلوم الســـاميات وريحة جــــــــدودى
الريحه اللي متى ما عطرت شالــــــى= يكبر مــقـــامي وأحس بقيمة وجــــــــودى
لاشم خشمي فعايل جدي وخالـــــى=كنى معطر بريـــــحة عــــــود كمـــــــبودى
شاعر و أرتب بنودي كيف يحلالــــــــى = والمفــردات الغريـــــبه مــاهي بنــــــــودى
تاليفي البيت والموال موالـــــــــــــــــى =والعود عودي وأدن دن به على عـــــــودى
ما أقلد الغير في الطلعة ومدخــــــالى= و أعتز بأهـــلي وناسي وألزم حــــــدودى
ما أركب الا الكلام اللي على بالــــــى=أورد مــــــوارد جــــدودي وأورد عــــــدودى
وإن قلت داري دار زايد ومنزالــــــــــى =ماكنى إلاّ الـيـزيد وخلــفي حشـــــــــودى
مر أعصم الغترة ع راسي ومر بعقالــى= وإن شفت حاجه لــلدفاع أموه جــــــنودى
أمشي تواضع تقل في قيد و أغلالــى=وإلا على شــان اللزوم اقــطع قــــــيودى
ما أصعر الخد بين الناس وأختالـــــــي= لــكــن اذا جت ع القصيد أصعر خـــدودى
إن قلت للقاف هيج شوي للعالـــــــى= توقف بلود الأطلســي و تعظم بــــــلودي
شبيت ضوى وأنا أهوجس ع فنجالــى=كنه لبســـني البارح مــارد يـــــــــــهودى
استغفر الله من كلمه على بالــــــى= أعلّم بها العــــذال وأعلّم احســــــــودى
ياقاف ياقاف قال القاف ما بالـــــــــى= أمسح وأقايس الساحة و أفرض وجودى
وراثي وأدوّن مفردة قومي وآلـــــــى = وإلا الحداثه حداثة شـــعــر لـــــبـــنودى
ماني من العام ذاك ولا من التالــــي= ماخذ وعاطى وعند الناس معــــدودى
شعرٍ لغالي يقرب غالي بغالــــــــي= يـتهامســن به بضف خدروهــن خودي
ياما قلوبٍ سحرها فلي وهالـــــــى= خـــلت ورود الــربيع وشمـــت وردودى
يارهّيف الحس خبرهم عن أحوالـى= يوم أنت تتمايس طرب وتعدّ منشودى
لا ذبت بالصوت وأنت تردد أمثالـــى = يجرفني الموت الاحمر لآخر حـــدودى
أحس بالحس وأتسلّى وأنا سالى = وأهمسك وألمسك وأنته طالب الزودى
بالخد والخال والخلخال تختالــــى = وتخمّر الخدّ لــين تــخدّر عــــــــــضودى
جسمي من الروح لاخالي ولا مالي= أفوق وأغيب و أصحى شـــوي وأعودى
أصــر وأمــر بين الــــمر والحــالــــي = وأفـــر وأكـــر لــكـــن قلــــــــبي يرودى
ماهو غرام وهيام ولعب جهالــــــى = قـــده وقدى وقــد الــقد وقــــــــــدودى
مــرفوق مرمـــوق لاقــيلٍ ولاقالـــى = متشفر الـــكــود نمبر كـــوده وكـــــودى
متشبع إلا حنان وشهد وزلالــــــى= لا جــــــا يجرعنى الغرام يقـــطع كبودى
لاباس لاباس لا سهلت مسهالى= النـــس للنـــاس والنسناس للنـــــــودى
ياملهمي هدّ هدّ الهول وأهوالـى=بالهون بالهون ياهــــل الــــــهود ياهودى
أعوذ بربّ الفلق من كل دجالـــى= يـــــــارب صّنى مــن الفتنه يامــعبــــودى
مصّلى الفرض والسنّه والأنفالــى=عبدك وأنا لــك ويوم الـــعــبد مـــــوعودى
أعبدك وأحمدك ع النعمة والأفضالى= ماكــــل وشارب ولاجــاهرت بســــــدودى
الحقوق و النوق والجمال جمالـــى=وش دخـل إلا الحســود ودخـل ضــــدودى
لا سنع جدى ولا بايع سنع خالــى= تســـلم ســـلــوم الجدود وريحة جــدودى
الريحه اللي متى ما عطرت شالــى= كنى معطـــر بريــحة عــــود كمــــــــبودى